दैनिक भ्रमर : राज्यातील एसटी महामंडळाच्या बसची दूरवस्था हा नवीन विषय राहिला नाही. त्यात बसच्या अपघातांमध्ये मोठी वाढ झाल्याने लाल परीने प्रवास करणं धोक्याचं झालं आहे. आता, पुन्हा एकदा लालपरीचा भीषण अपघात झाल्याची घटना समोर आली आहे. जळगाव जिल्ह्यातील पारोळा-भडगाव रस्त्यावर बस आणि आयशर गाडीचा भीषण अपघात झाला. या भीषण अपघातात एकाचा मृत्यू झाला असून २५ ते ३० प्रवासी जखमी झाले आहेत.
धुळे-सोयगाव मार्गावरील चोरवड-पारोळा रोडवर राज्य परिवहन महामंडळाची बस प्रवाशांसह जात असताना समोरुन आलेल्या आयशर ट्रकची जोरदार धडक बसला बसली. या भीषण अपघातात बसचा पुढील भाग अक्षरश:चेंदामेंदा झाला आहे. या भीषण अपघातात एकाचा मृत्यू झाला आहे. तर जखमी असलेल्या २५ पैकी दोन प्रवासी गंभीर जखमी आहेत.
दरम्यान, घटनेची माहिती मिळताच पोलिसांनी व स्थानिकांनी घटनास्थळी धाव घेत मदतकार्य सुरू केले. त्यानंतर, जखमींना तात्काळ पारोळा येथील कुटीर रुग्णालयात दाखल करण्यात आले असून त्यांच्यावर उपचार सुरू आहेत.
