सातपूर, नाशिक – सातपूर परिसरातील रिलायन्स पेट्रोल पंपजवळ आज (शनिवार, दि. ११ ऑक्टोबर) सकाळी सुमारे दहा ते सव्वा दहा वाजेच्या सुमारास झालेल्या भीषण अपघातात आठ वर्षांच्या चिमुरडीचा ट्रकखाली चिरडून जागीच मृत्यू झाला. या घटनेने परिसरात हळहळ व्यक्त केली जात आहे.
पोलीसांनी दिलेल्या माहितीनुसार, मृत मुलगी नेविका अभिषेक नेरकर (वय ८, रा. मयूर स्वीटच्या पाठीमागे, आनंदवली पाईपलाईन रोड, सातपूर) अशी आहे. नेविका ही आपल्या आजीसोबत दुचाकीवरून (टीव्हीएस ज्युपिटर, क्रमांक एमएच १५ जेई ९१८१) घराकडे जात होती.
दरम्यान, रिलायन्स पेट्रोल पंपाजवळून जात असताना पाठीमागून येणाऱ्या ट्रक क्रमांक-एम एच 17 बी डी ५०५ दुचाकीला जोरात कट मारला . त्यामुळे दुचाकीवरील तोल जाऊन वेदिका खाली पडली आणि ट्रकच्या मागच्या चाकाखाली येऊन ती जागीच ठार झाली.
अपघातानंतर ट्रक चालकाने घटनास्थळावरून पळ काढला असून सातपूर पोलिसांनी त्याचा शोध सुरू केला आहे. घटनास्थळी मोठी गर्दी जमली होती. नागरिकांनी रस्ता रोको आंदोलन करत सिग्नल व गतिरोधक टाकण्याची मागणी केली.पोलिसांनी अपघाताची माहिती घेण्यासाठी परिसरातील सीसीटीव्ही फुटेज तपासण्यास सुरुवात केली आहे.
या अपघातामुळे परिसरात शोककळा पसरली असून नागरिकांमध्ये संतापाचे वातावरण आहे. वेदिका ही आनंदवली परिसरातील रहिवासी असून चिमुरडीच्या मृत्यूने सर्वत्र हळहळ व्यक्त केली जात आहे. पोलीस अधिक तपास सातपूर पोलिस ठाण्याचे कर्मचारी करत आहेत.
