मनमाड (प्रतिनिधी) :- जिल्ह्यातील सर्वात मोठी नगरपरिषद म्हणून ओळखल्या जाणाऱ्या मनमाड नगर परिषदेमध्ये पंचवार्षिक निवडणुकीचे रणधुमळी सुरू असतानाच एक दुःखद घटना घडली आहे.
शहरातील प्रभाग क्रमांक १० अ मधील ठाकरेंच्या शिवसेनेचे उमेदवार नितीन वाघमारे यांचे ह्रदयविकाराच्या झटक्याने निधन झाले आहे. या घटनेमुळे शहरात हळहळ व्यक्त केली जात आहे.
नितीन वाघमारे यांनी प्रचाराला देखील जोरदार सुरुवात केली होती. मात्र, रात्री झोपेत त्यांना हृदयविकाराचा झटका आल्याने त्यांचा मृत्यू झाला असून त्यांच्या निधनाचे वृत्त कळताच विविध राजकीय पक्षाचे नेते आणि पदाधिकाऱ्यांनी त्यांच्या निवासस्थानी जाऊन त्यांना श्रद्धांजली अर्पण केली.
निवडणुकीच्या पार्श्वभूमीवर उमेदवारांचा उत्साह, पक्षाचा प्रचार आणि कार्यकर्त्यांची धावपळ सुरू असतानाच घडलेल्या या घटनेमुळे ठाकरेंच्या शिवसेनेत शोककळा पसरली आहे. वाघमारे यांच्या निधनाने प्रभाग क्रमांक १० अ मधील निवडणूक पुढे ढकलली जाणार का? असा प्रश्न उपस्थित केला जात आहे. त्यामुळे निवडणूक आयोग काय निर्णय घेतो याकडे सर्वांचे लक्ष लागले आहे.
