इगतपुरी (भ्रमर वार्ताहर) :- 7 फेब्रुवारी 2025 ला इगतपुरी तालुक्यातील टाकेद बुद्रुक येथे शिक्षकी पेशाला काळीमा फासणारी घटना उघडकीस आली होती. शाळेच्या मुख्याध्यापकानेच वर्गशिक्षकाच्या मदतीने 13 वर्षाच्या अल्पवयीन मुलीवर अत्याचार केल्याचे समोर आले होते. घोटी पोलिसांनी याबाबत मुख्याध्यापकासह वर्गशिक्षकाला अटक केली होती.
भारतीय न्याय संहिता आणि बाल संरक्षण व अत्याचार प्रतिबंधक कायद्यानुसार दाखल झालेल्या प्रकरणी जिल्हा न्यायालयाच्या अतिरिक्त जिल्हा सत्र न्यायाधीश पी. व्ही. घुले यांनी निकाल पारित केला आहे. शाळेचा मुख्याध्यापक तुकाराम गोविंद साबळे (वय 53, रा. टाकेद बुद्रुक, ता. इगतपुरी, जि. नाशिक) आणि वर्गशिक्षक गोरखनाथ मारुती जोशी (वय 43, रा. जोशीवाडी टाकेद बुद्रुक, ता. इगतपुरी, जि. नाशिक) या दोघांना दोषी ठरवण्यात आले. दोघांना शिक्षा सुनावण्यात आली आहे. याप्रकरणी घोटीचे तत्कालीन पोलीस निरीक्षक विनोद पाटील यांनी तपास केला होता. त्यांनी उत्तम तपास केल्याने आरोपींना कठोर शिक्षा झाली. याबद्धल त्यांचे सर्वत्र कौतुक करण्यात येत आहे. सरकारी अभियोक्ता म्हणून अॅड. लिना चव्हाण यांनी काम पाहिले.
याबाबत अधिक माहिती अशी की, 7 फेब्रुवारी 2025 ला आरोपी वर्गशिक्षक गोरखनाथ मारूती जोशी याचा गणिताचा क्लास चालू होता. यावेळी आरोपी मुख्याध्यापक तुकाराम गोविंद साबळे याचा त्याला फोन आला. तेव्हा आरोपी गोरखनाथ जोशी याने काहीएक खातरजामा न करता 13 वर्षीय पीडित बालिकेला सांगितले की, तुझी आजी साबळे सरांच्या घरी आली आहे. तुला साबळे सरांनी त्यांचे घरी बोलविले असे सांगितले.
तुकाराम साबळे हा शाळा परिसराच्या बाहेर राहतो हे गोरखनाथ जोशी याला माहित होते. तरीही त्याने पीडित बालिकेला एकटीलाच तुकाराम साबळे याच्या घरी पाठवून दिले. पीडित बालिका तुकाराम साबळेच्या घरी गेल्यावर त्याने तिच्या अज्ञानपणाचा फायदा घेऊन बेडरूममध्ये तिच्यावर लैंगिक अत्याचार केला. पीडीतेने परत शाळेत आल्यावर घडलेला प्रकार गोरखनाथ जोशी याला सांगूनही त्याने पीडितेवर झालेल्या अत्याचाराची कोणतीही दखल घेतली नाही.
याबाबतची तक्रार देण्यासाठी तिला मदत केली नाही. याप्रकरणी न्यायालयाने आरोपी मुख्याध्यापक तुकाराम गोविंद साबळे याला दोषी ठरवून भा.न्या.सं. 64 (2) (एफ), पोक्सो 4,6 यामध्ये आजन्म कारावास व 2 लाख रूपये दंड व दंड न भरल्यास 1 वर्षाची साधी कैद, पोस्को कलम 10 मध्ये 7 वर्षाचा सक्त कारावास आणि 25 हजार रूपये दंड, पोस्को 8 मध्ये 5 वर्ष सक्त कारावास व 25 हजार रूपये दंड अशी शिक्षा सुनावण्यात आली आहे. आरोपी शिक्षक गोरखनाथ मारुती जोशी याला पोक्सो कलम 21 मध्ये दोषी ठरवून 6 महिने साधा कारावास शिक्षा व 68 हजार रूपये दंड, दंड न भरल्यास 3 महिने साथी कैद अशी शिक्षा सुनावण्यात आली. आरोपींना शिक्षा झाल्याने टाकेद बुद्रुक परिसर आणि संपूर्ण इगतपुरी तालुक्यात समाधान व्यक्त केले जात आहे
