नाशिक (भ्रमर प्रतिनिधी) :- राष्ट्रीय स्वयंसेवक संघाच्या जडणघडणीत गोळवलकर गुरुजी यांच्या समवेत कार्य केलेले आरएसएसचे नाशिक विभाग कार्यवाह व एचपीटी महाविद्यालयातील निवृत्त प्राध्यापक दादासाहेब अर्थात रमेशचंद्र धोंडोपंत रत्नपारखी (वय ९६) यांचे वृद्धापकाळाने निधन झाले.
त्यांच्यावर अंत्यसंस्कार उद्या (दि.२) सकाळी 8 वाजता केले जाणार आहे. दादासाहेब रत्नपारखी हे लहानपणापासूनच संघाचे स्वयंसेवक होते. त्यांनी गोळवलकर गुरुजी यांच्या समवेतही संघाचे काम केलेले आहे.
त्यानंतर अनेक वर्षे ते संघाचे स्वयंसेवक व नाशिक शहर कार्यवाह, धुळे, नाशिक, जळगाव यातील जिल्ह्यांचे विभाग कार्यवाह म्हणूनही काम केले आहे. भोसला मिलिटरी एज्युकेशन संस्थेच्या जनरल सेक्रेटरीपदी तसेच शंकराचार्य न्यासाचे अध्यक्ष म्हणूनही त्यांनी काम केले आहे.
गोखले एज्युकेशन सोसायटीच्या एचपीटी महाविद्यालयात ते प्राध्यापक म्हणून कार्यरत होते. सेवानिवृत्तीनंतर त्यांनी संघाचे काम अधिक जोमाने सुरू केले होते. आणिबाणीच्या काळात त्यांनी कारावास भोगला आहे. संघाचे जुने स्वयंसेवक व एक आदर्श व्यक्ती म्हणून ते नाशिककरांना परिचित होते.
रविवार कारंजा येथील सुंदर नारायण मंदिरासमोर त्यांचा भव्य वाडा आहे. सध्या ते गंगापूर रोड येथील शंकरनगर येथे रहात होते. वयोमानामुळे ते सध्या घरातच होते.
त्यांच्या पश्चात उद्योजक मुलगा राजेश रत्नपारखी, सुन व नात असा परिवार आहे.
