३८ वर्षीय दिव्यांग क्रिकेटपटू विक्रम सिंग याचा ट्रेनमध्येच तडफडून मृत्यू झाल्याची धक्कादायक माहिती समोर आली आहे. तीन तास ट्रेनमध्ये उपचार मिळाले नाहीत, त्यामुळे त्याचा मृत्यू झाला.
मिळालेल्या माहितीनुसार बुधवार, ४ जून रोजी मथुराजवळ छत्तीसगड एक्सप्रेसमध्ये विक्रम सिंग याचा मृत्यू झाला. विक्रम ग्वाल्हेरमध्ये होणाऱ्या एका क्रिकेट स्पर्धेसाठी ट्रेनमधून निघाला होता. प्रवासादरम्यान विक्रमची प्रकृती अचानक बिघडली. तब्बल तीन तास त्याने वैद्यकीय मदतीची वाट पाहिली. पण उपचार मिळाले नाहीत, त्यामुळे त्याचा मृत्यू झाला.
विक्रम सिंग हा पंजाबच्या पिहडी गावातील दिव्यांग क्रिकेटपटू आहे. विक्रम सिंग याचं छत्तीसगड एक्स्प्रेसमध्ये निधन झाले. ते दिल्लीच्या निजामुद्दीन स्थानकावरून ११ खेळाडूंसह ग्वाल्हेरमध्ये नॅशनल व्हीलचेयर क्रिकेट स्पर्धेसाठी जात होते. पण रेल्वे प्रवासादरम्यान त्याची तब्येत अचानक बिघडली आणि वेळेवर उपचार न मिळाल्याने रेल्वेतच अखेरचा श्वास घेतला.
विक्रम याची तब्येत खराब झाल्यानंतर तात्काळ रेल्वे हेल्पलाइन १३९ वर सकाळी संपर्क साधण्यात आला. रेल्वेकडून मथुरा स्थानकावर डॉक्टर उपलब्ध होतील, असे सांगण्यात आले. पण अझाई स्थानकावरच रेल्वे तब्बल दीड तास थांबली. या काळात विक्रम याला कोणतीही वैद्यकीय सेवा मिळाली नाही. त्यामुळे प्रकृती आणखी खालावली. ज्यावेळी रेल्वे मथुरा स्थानकावर पोहोचली, त्यावेळी उशीर झाला होता. उपचार न मिळाल्याने विक्रम यांनी श्वास सोडला होता.
