नाशिकरोड (भ्रमर प्रतिनिधी) :- श्रीरामपूरहून नाशिककडे वाहनातून अवैधरीत्या गोमांसाची वाहतूक करणार्या वाहनाचा थरारक पाठलाग करून बजरंग दलाच्या कार्यकर्त्यांनी ते अडवले असून, एक जण पसार झाला असून, एकाला ताब्यात घेतले आहे.
याबाबत अधिक माहिती अशी, की श्रीरामपूर येथून इकोफोर्ड वाहनातून नाशिककडे गोमांस येणार असल्याची माहिती बजरंग दलाच्या कार्यकर्त्यांना मिळाली होती. त्यानुसार बजरंग दलाचे उपजिल्हाध्यक्ष सोनू नागरे, प्रमुख पदाधिकारी श्रीकांत क्षत्रिय, संग्राम फडके, नितीन पाटील, कुणाल जाधव, कृष्णा साखला व पिंटू सिसोदिया यांनी शिंदे टोल नाका येथे जाऊन सिन्नरकडून येणार्या वाहनांवर लक्ष ठेवले व संशयित इकोफोर्ड वाहनाची प्रतीक्षा करू लागले. त्या दरम्यान एमएच 15 डीएस 7845 या क्रमांकाचे वाहन संशयास्पदरीत्या सिन्नरहून नाशिककडे येताना दिसले.
बजरंग दलाच्या कार्यकर्त्यांनी या वाहनाला शिंदे टोलनाका सोडल्यानंतर वाहनचालकास थांबण्याचा इशारा केला; मात्र वाहनचालकाने त्याकडे दुर्लक्ष करून पळ काढला. सिन्नर फाटा, बिटको पॉईंट, नाशिकरोड व दत्तमंदिर सिग्नल परिसरात गर्दी असताना या वाहनचालकाने भरधाव वाहन चालवून स्वत:सह नागरिकांचा जीव धोक्यात घातला. अशा परिस्थितीत बजरंग दलाच्या कार्यकर्त्यांनी या वाहनाचा थरारक पाठलाग करून ते अखेर उपनगर हद्दीतील जेतवननगरजवळील एका शाळेजवळ अडवण्यात यश मिळविले.
त्यावेळी कार्यकर्त्यांनी वाहनाची झडती घेतली असता एक जण पळून जाण्यात यशस्वी झाला. तर दुसर्याला ताब्यात घेतले आहे. या वाहनामध्ये सुमारे 200 किलो गोमांस असल्याचा अंदाज व्यक्त केला जात आहे. राज्यभरात गोमांसावर बंदी असतानासुद्धा अशा प्रकारची वाहतूक सुरू असल्यामुळे बजरंग दलाच्या कार्यकर्त्यांनी प्रशासनाविरोधात नाराजी व्यक्त केली. यावेळी बजरंग दलाच्या कार्यकर्त्यांनी गाडीतील गोमांस काढून ते नाशिक-पुणे महामार्गावर ठेवून रास्ता रोको आंदोलन केले.
या आंदोलनामुळे नाशिकरोड ते नाशिक या मार्गावरील वाहतूक सुमारे अर्धा तास खोळंबली होती. आंदोलनाची माहिती मिळताच उपनगर पोलीस ठाण्याचे वरिष्ठ पोलीस निरीक्षक जयंत शिरसाठ, पोलीस निरीक्षक प्रभाकर सोनवणे आदींसह अधिकारी व कर्मचार्यांनी घटनास्थळी धाव घेतली. यावेळी पोलीस अधिकार्यांनी आंदोलकांची समजूत काढून त्यांना आंदोलन थांबविण्याची विनंती केली. त्यानुसार कार्यकर्त्यांनी आंदोलन थांबविले.
