पिंपरी चिंचवड : चऱ्होली खून प्रकरणात मोठी अपडेट समोर आली आहे. हत्या प्रकरणात फरार असलेला आरोपी माजी नगरसेवक किसन तापकीरसह सहा जणांच्या टोळीवर महाराष्ट्र संघटित गुन्हेगारी नियंत्रण अधिनियम (मोका)अंतर्गत कारवाई करण्यात आली आहे. पोलिस आयुक्त विनय कुमार चौबे यांनी याबाबतचे आदेश दिले आहेत.
चऱ्होली येथे व्यावसायिक नितीन गिलबिले यांच्या खून प्रकरणी फरार असलेला आरोपी माजी नगरसेवक किसन ऊर्फ महाराज ज्ञानोबा तापकीर याच्यासह सहा जणांच्या टोळीवर पोलिसांनी महाराष्ट्र संघटित गुन्हेगारी नियंत्रण अधिनियम (मकोका) अंतर्गत कारवाई केली आहे. १२ नोव्हेंबरला आर्थिक वादातून गिलबिले यांची डोक्यात गोळ्या झाडून हत्या करण्यात आली होती.
पोलिसांनी अमित जीवन पठारे, विक्रांत सुरेश ठाकूर (रा. सोळू, खेड), आकाश सोमनाथ पठारे (दोघेही रा. चऱ्होली बुद्रूक), सुमीत फुलचंद पटेल (रा. दिघी), सोन्या लांडगे (रा. पौड) यांना अटक केली आहे. तापकीर (रा. चऱ्होली बुद्रूक) व सोमनाथ पाटोळे (रा. सोळू, खेड) हे दोघे फरार आहेत. पिंपरी चिंचवड पोलिसांनी यातील लांडगे वगळता इतरांवर ‘मकोका’ कारवाई केली. या आरोपींवर सात गंभीर गुन्हे दाखल आहेत.
नेमकं प्रकरण काय ?
चऱ्होली येथे १२ नोव्हेंबर रोजी सायंकाळी अलंकापुरम रस्त्यावर आर्थिक वादातून व्यावसायिक नितीन गिलबिले या व्यावसायिकाची गोळ्या घालून हत्या करण्यात आली होती, पोलिसांनी दिलेल्या माहितीनुसार, गिलबिले आणि त्यांच्या ओळखीतील काही जण थांबलेले असताना अमित पठारे आणि विक्रांत ठाकूर हे फॉर्च्युनर कारमधून तेथे आले. त्यांनी नितीन गिलबिले यांना कारमध्ये बसवून त्यांच्या डोक्यात जवळून गोळी झाडली. आणि गिलबिले यांचा जागीच मृत्यू झाला. मृतदेह तिथेच टाकून आरोपी घटनेस्थळावरून पसार झाले.
खुनाचे नेमके कारणाच्या तपासादरम्यान तापकीर यांचे नाव आरोपींकडून समोर येत असल्याने तपासाची दिशा बदलली. गुन्ह्यातील अचूक कारण, संबंध, आर्थिक किंवा वैयक्तिक वाद; तसेच तापकीर यांचा प्रत्यक्ष, अप्रत्यक्ष हस्तक्षेप याबाबत पोलिसांकडून सखोल तपासणी सुरू आहे. तापकीर यांचा शोध सुरू करण्यात आला असून, दिघी पोलिसांनी त्यांच्यासाठी स्वतंत्र पथक तयार केल्याचे सांगण्यात येत आहे. तापकीर अद्याप फरार आहे.
