आगामी नाशिक महानगरपालिका निवडणुकीच्या पार्श्वभूमीवर भाजपने राजकीय फोडाफाडीला सुरुवात केली आहे. याच रणनीतीचा एक भाग म्हणून गुरुवारी भाजपकडून नाशिक महानगरपालिकेतील ठाकरे गटाचे दोन बडे मोहरे गळाला लावले. ठाकरे गटाचे नेते आणि माजी महापौर विनायक पांडे, यतीन वाघ, शाहू खैरे यांचा आज पक्षप्रवेश होणार आहे. मात्र, या पक्षप्रवेशाला भाजपचे स्थानिक कार्यकर्ते आणि भाजपच्या निवडणूक प्रमुख देवयानी फरांदे यांनी कडाडून विरोध केला आहे. तरीही विनायक पांडे, यतीन वाघ, शाहू खैरे हे नेते पक्षप्रवेशासाठी भाजपच्या कार्यालयात पोहोचले आहेत.
नाशिकच्या भाजप आमदार देवयानी फरांदे यांनी विनायक पांडे आणि यतीन वाघ यांच्या पक्ष प्रवेशाला विरोध केला आहे. या दोघांना पक्षात घेण्यासासंबंधी माझ्याशी कोणतीही चर्चा झालेली नाही असं देवयानी फरांदे यांनी म्हटलं आहे. नाशिक भाजपच्या स्थानिक पदाधिकाऱ्यांचा या पक्ष प्रवेशाला विरोध आहे. विनायक पांडे आणि यतीन वाघ यांच्या पक्ष प्रवेशावरुन नाशिक भाजप कार्यालयाबाहेर वादाची स्थिती निर्माण झाली आहे.
नाशिक भाजप कार्यालयाबाहेर एक हाय वोलेटेज ड्रामा पहायला मिळत आहे. कोणत्याही परिस्थितीत हा पक्ष प्रवेश होऊ देणार नाही अशी भूमिका देवयानी फरांदे यांनी घेतली आहे. त्यामुळे पक्ष प्रवेशाच्यावेळी दोन्ही गट आमने-सामने येण्याची भिती आहे. विनायक पांडे आणि यतीन वाघ यांना भाजपत घेतल्यास स्थानिक कार्यकर्त्यांची संधी हुकण्याची शक्यता आहे. त्यामुळे या पक्ष प्रवेशाला विरोध होत आहे.
“काहीही झालं, तरी हा पक्ष प्रवेश होऊ देणार नाही. आम्ही सगळी तयारी करायला लावली. ते दरवाजा ठोठावत आहेत. पण भाजपचा दरवाजा निष्ठावंतांसाठी उघडणार. गिरीश महाजन, देवयानी फरांदे यांच्यावर आमचा पूर्ण विश्वास आहे. हे त्यांचा स्वार्थ साध्य करण्यासाठी आलेत” अशी टीका स्थानिक भाजप पदाधिकाऱ्यांनी केली. दरम्यान संजय राऊत यांनी टि्वट करुन विनायक पांडे आणि यतीन वाघ यांची पक्षातून हकालपट्टी करण्यात येत असल्याचं जाहीर केलं. पण काल संध्याकाळीच दोन्ही नेत्यांनी आपल्या पदाचा आणि पक्ष सदस्यत्वाचा राजीनामा दिला होता.
