बुधवारी उपमुख्यमंत्री अजित पवार यांच्या विमानाचा भीषण अपघात झाला, ते मुंबईवरून बारामतीकडे निघाले होते, विमान धावपट्टीवर उतरत असतानाच विमानावरील नियंत्रण सुटलं आणि विमान थेट जमिनीला धडकलं, घटनास्थळी मोठा स्फोट झाला, आणि विमानाला आग लागली. या घटनेमध्ये अजित पवार यांच्यासह पाच जणांचा मृत्यू झाला आहे. आज अजित पवार यांच्यावर बारामतीमध्ये शोकाकूल वातावरणामध्ये अंत्यसंस्कार करण्यात आले. अजित पवार यांच्या निधनामुळे संपूर्ण राज्यावर शोककळा पसरली आहे.
आता अजित पवार यांच्या निधनानंतर आता राजकीय घडामोडींना वेग आला आहे. अजित पवार यांच्या निधनामुळे उपमुख्यमंत्री तसेच अर्थमंत्रीपदाची जागा रिक्त झाली आहे. या जागेवर अजितदादा यांच्या पत्नी सुनेत्रा पवार यांची नेमणूक करावी यासाठी राष्ट्रवादी अजित पवार गटाचे नेते तसेच कार्यकर्ते आग्रही आहेत.
राष्ट्रवादीचे नेते प्रफुल्ल पटेल आणि छगन भुजबळ यांनी सुनेत्रा पवार यांची भेट घेतली आहे त्यामुळे राजकीय घडामोडींना वेग आला आहे. राष्ट्रवादीची कमान सुनेत्रा पवार यांनी हाती घ्यावी आणि उपमुख्यमंत्रीपदही त्यांनी सांभाळावं यासाठी राष्ट्रवादीचे नेते प्रयत्न करत आहेत. सूत्रांच्या माहितीनुसार, सुनेत्रा पवार यांनी उपमुख्यमंत्री करण्याचा प्रस्ताव दिला जाईल. प्रफुल्ल पटेल यांच्याकडे राष्ट्रवादीचं अध्यक्षपद जाऊ शकतं. या प्रस्तावावर चर्चा करण्यासाठी राष्ट्रवादीचे नेते मुख्यमंत्री देवेंद्र फडणवीस यांना भेटण्याची शक्यता आहे. यावेळी राष्ट्रवादीच्या विलिनिकरणावरही चर्चा होण्याची शक्यता वर्तवली जाऊ शकते.
तर दुसरीकडे राष्ट्रवादीचे नेते आणि मंत्री नरहरी झिरवळ यांनीही सुनेत्रा पवार यांना उपमुख्यमंत्री करण्याची मागणी रेटून धरली आहे. वहिनींना उपमुख्यमंत्री करण्याची इच्छा काही लोक वर्तवत आहेत, असं झिरवळ यांनी म्हटलंय. तसेच अजित पवार यांच्या नंतर सुनेत्रा पवार यांनाच उपमुख्यमंत्री करावं, अशी मागणी अजितदादा समर्थकांकडून देखील करण्यात येत आहे.
