नाशिक - नाशिक जिल्ह्यामध्ये पावसाने चांगलीच दाणादाण उडाली असून जिल्ह्यामध्ये पावसाने 1हजार मिलिमीटर पेक्षा जास्त ची नोंद केली आहे तर मागील बारा तासांमध्ये 62 मिलिमीटर पावसाची नोंद झालेली आहे. यामुळे जिल्ह्यात अनेक नद्यांनी धोक्याची पातळी ओलांडलेली आहे तर गोदावरी नदीला पुन्हा पूर आलेला आहे.
नाशिक शहर आणि जिल्हा परिसरामध्ये शनिवारी बदललेल्या हस्त नक्षत्राच्या पावसाने जोरदार हजेरी लावली आहे. त्यामुळे जिल्ह्यामध्ये चांगली दाणादाण उडालेली आहे. शनिवारी सायंकाळी आठ वाजेपासून सुरू झालेल्या पावसामुळे जिल्ह्यात रविवारी सकाळी आठ वाजेपर्यंत 62 मिलिमीटर पावसाची नोंद झालेली होती.
12 तासांमध्ये झालेली ही नोंद एक रेकॉर्ड मानले जात आहे तर नाशिक जिल्ह्यामध्ये आत्तापर्यंत म्हणजेच 1 जून पासून ते 28 सप्टेंबर पर्यंत पावसाने 1005 मिलीमिटर पडण्याचा विक्रम देखील नोंदविलेला आहे. यापैकी रात्री 2:30 पासून ते पहाटे 5 वाजून 30 मिनिटांपर्यंत 14.2 मिलीमीटर पाऊस नोंदविण्यात आलेला आहे.
सतत सुरू असलेल्या पावसामुळे गंगापूर धरणातून पाण्याचा विसर्ग वाढविण्यात आलेला आहे. दारणा धरणातून 12 हजार क्युसेस पाणी नदीपात्रात सोडण्यात आलेले आहे. पाटबंधारे विभागाच्या वतीने सकाळी 6 वाजता नदीपात्रात सोडण्यात आलेल्या पाण्याची देण्यात आलेल्या माहितीनुसार दारणा 12167, वालदेवी 814, आळंदी 243, होळकर पुलाखालून 8150, भावली 290, भाम 510, वाघाड 930, पालखेड 12124, नांदूर मधमेश्वर 31283, करंजवण 6575, कडवा 6752, तिसगाव-78, गौतमी गोदावरी 1296, काश्यपी 480, ओझरखेड 700, पुणे गाव 1920, मुकणे 760, वाकी 444 क्युसेस पाणी हे नदीपात्रामध्ये सोडण्यात आलेले आहे. यामुळे सर्वच नद्यांनी धोक्याची पातळी ओलांडली आहे.
