श्रद्धा आणि अंधश्रद्धा यात फरक. पण तो जाणून घेण्यात अनेक लोक आजही अपयशी आहेत. त्यात सुशीक्षित लोकही काही मागे नाही. पुण्यातील एका सुशिक्षित दांपत्याला एका भोंदूबाबाने एक , दोन नव्हे तर तब्बल १४ कोटींना लुबाडले. सुशिक्षित दांपत्य मुलींच्या आजारपणामुळे तणावात होते आणि याचाच फायदा या भोंदूबाबाने घेतल्याचा खळबळजनक प्रकार समोर आला आहे.
पोलिसांकडून मिळालेल्या माहितीनुसार, पीडित कुटुंबातील पती-पत्नी हे एका खाजगी कंपनीमध्ये कामाला आहेत. त्यांना दोन मुली असून त्या दोघींनाही काही व्याधी आहेत, त्यामुळे त्या आजारी असतात. त्यातील एका मुलीला अलुपेशीया नावाचा आजार असल्याने तिला कमी प्रमाणात केस येतात. या दांपत्याला भजनाची आवड असल्याने ते अनेक ठिकाणी या कार्यक्रमासाठी जात असत. आणि त्याचवेळी त्या दोघांची दिपक जनार्दन खडके या व्यक्तीशी ओळख झाली.
त्या दांपत्याच्या मुलीबाबत खडके यांना कळले, आणि हेच त्यांनी हेरले. याच परिस्थीचा फायदा घेण्याचे त्याने ठरवले, खडके यांनी तेव्हा त्यांनी त्या पती-पत्नीची ओळख वेदिका कुणाल पंढरपूरकर व कुणाल पंढरपूरकर यांच्याशी करून दिली. वेदिका या शंकर बाबाची लेक असून वेदिकाच्या अंगात शंकर बाबा येतात ते तुमचे सर्व काम करून देतील तुमच्या मुलींचे आजार ठीक करतील तुम्ही निश्‍चिंत रहा असे त्यांनी त्या दांपत्याला सांगितले.
त्यानंतर खडके यांच्या एका दरबारात, या दांपत्याला जेव्हा वेदिका भेटली तेव्हा तिने अंगात शंकर बाबा आल्याचे सांगितले. तसेच शंकर महाराज अंगात येत असल्याचे दाखवले.त्या दांपत्याकडे असलेली सर्व रक्कम माझ्याकडे द्या असे त्यांना सांगितले. तुमच्या मुलींचा आजार गंभीर आहे, दोष जास्त आहेत असे म्हणत आजार बरा होण्यास बराच कालावधी लागेल असे सांगून त्या दोघांनी पीडित दांपत्याकडून करोडो रुपये उकळले.
मात्र हा प्रकार एवढ्यावरच थांबला नाही तर वेदिका नामक महिलेने पुन्हा एकदा शंकर महाराज यांचा अभिनय करून घर विका, शेती विका आणि पैसे जमा करा असे त्या दांपत्याला सांगितली, त्यांची पुन्हा फसवणूक केली. आपल्या मुली बर्‍या होतील या अपेक्षेने त्या दांपत्याने त्यांच्यावर विश्‍वास ठेवला आणि परदेशातील घर सुद्धा विकले आणि त्याचे पैसे या महिलेला दिले.
त्या महिलेने दांपत्याची सर्व बचत, घराची रक्कम असे करत कोट्यवधी रुपये हडप केले. मात्र त्यापुढे देविका नावाच्या महिलेने त्या दांपत्याला सुपारी, नारळ व दगड अशा वस्तू घरात ठेवण्यास सांगितल्या. शेवटचा पर्याय असल्याचे सांगून त्यांनी दांपत्याला राहते घर देखील विकायला सांगितले पण ते घरे एकमेव आसरा आहे असे सांगत त्यांनी घर विकण्यास नकार दिला.
मात्र एवढे होऊन, आपल्या मुली बर्‍या होत नसल्याने गेल्या 3 वर्षांपासून सुरू असलेल्या या गोष्टी फसवणुकीचा हा प्रकार असल्याचे त्या दांपत्याला समजले. अखेर या दांपत्याने पोलिसांकडे धाव घेतली आहे. आम्हाला खोटी माहिती देऊन, अंगात शंकर महाराज येतात असे भासवून आमचा विश्‍वास संपादन करून आम्हास खोट्या भूलथापा देऊन, आश्‍वासन देऊन आमच्या मिळकती विकण्यास सांगून सदरची रक्कम त्यांच्या खात्यामध्ये जमा करण्यास सांगून आमची 14 कोटी रुपयांची फसवणूक केली असल्याची तक्रार या दांपत्याने केली. पोलिस याप्रकरणी अधिक तपास करत आहेत.
