राज्यात महानगरपालिका निवडणुकीच्या तोंडावर राजकीय वर्तुळात घडामोडींना वेग आला आहे. बैठका, मुलाखती, चर्चा, जागावाटप या घडामोडी घड असतानाच अचानकपणे आज सकाळी राष्ट्रवादी काँग्रेसचे अध्यक्ष आणि राज्याचे उपमुख्यमंत्री अजित पवार यांनी सर्वांनाच चक्रावून सोडलं. उपमुख्यमंत्री अजित पवार अचानकपणे बारामती हॉस्टेलमधून रवाना झाल्याने महाराष्ट्राच्या राजकीय वर्तुळात खळबळ उडाली आहे.
सकाळी सात वाजता ते त्यांचे पोलीस संरक्षण आणि ताफा सोबत न घेता, केवळ चालकासह एका वाहनाने बाहेर पडले. अजित पवार ज्या वाहनाने रवाना झाले, ते वाहन नंतर पुण्यातील त्यांच्या जिजाई निवासस्थानी दिसले. मात्र, कर्मचारी त्यांच्या निवासस्थानी असल्याची माहिती देण्यास टाळाटाळ करत आहेत.
राष्ट्रवादी काँग्रेसच्या दोन्ही गटांमध्ये एकत्र येण्यासंबंधीच्या चर्चा चिन्हाच्या मुद्द्यावरून फिसकटल्याची माहिती आहे. अजित पवार घड्याळ चिन्हावर निवडणूक लढवण्यासाठी आग्रही असल्याने हे घडले असे सांगितले जाते. या पार्श्वभूमीवर अजित पवारांचा हा अचानक आणि गोपनीय प्रवास राजकीय घडामोडींना वेग देणारा मानला जात आहे. पडद्यामागे काहीतरी मोठ्या राजकीय हालचाली सुरू असल्याचा अंदाज व्यक्त होत आहे. अजित पवार नेमके गेले कुठे? आणि का गेले? असा प्रश्न सर्वांना पडला होता.
