नागपुर शहरातून एक धक्कादायक बातमी समोर आली आहे. नागपुरच्या महादुला (कोराडी) परिसरात एका विवाहितेने आयुष्य संपवल्याने खळबळ उडाली आहे. मयुरी मेंढे असं आत्महत्या केलेल्या महिलेचे नाव असून आपल्या माहेरच्या घरी तिने टोकाचे पाऊल उचलले. मी तुमच्यावर खूप प्रेम करते…' अशी चिठ्ठीतून वेदना व्यक्त करत मयुरीने गळफास घेत आपली जीवनयात्रा संपवली आहे. आत्महत्येपूर्वी लिहलेल्या भावनिक चिठ्ठीतुन पतीवर प्रेम व्यक्त करत मनातील दुःख मांडले आहे.
पती पत्नीमध्ये वारंवार भांडणे होत असल्याने मानसिक तणावातून हे टोकाचे पाऊल उचलल्याची प्राथमिक माहिती समोर आली आहे. मृत्यूआधी तिने पतीला लिहलेली चिठ्ठीही पोलिसांनी जप्त केली आहे. मृत मयुरी लोंढे आणि तिच्या पतीमध्ये वारंवार वाद होत होते. त्यामुळेच ती मानसिक तणावाखाली होती. वादामुळे महिनाभरापूर्वीच ती माहेरी परतली होती. आपल्या पतीशी तिने संपर्क साधण्याचा प्रयत्न केला मात्र पती फोन उचलत नसल्याने ती हताश झाली. याच नैराश्यातून मयुरीने घरातील मंडळी बाहेर गेले असताना टोकाचे पाऊल उचलत गळफास घेऊन जीवन संपवले.
दरम्यान, रात्री घरातील मंडळी परतल्यानंतर मयुरी दरवाजा उघडत नसल्याने कुटुंबियांना शंका आली. त्यांनी तात्काळ घराचा दरवाजा उघडून आतमध्ये प्रवेश केला असता मयुरीही बेशुद्धावस्थेत आढळून आली. कुटुंबियांनी तिला तात्काळ रुग्णालयात दाखल केले मात्र डॉक्टरांनी ती मृत झाल्याचे घोषित केले. याप्रकरणी माहेरच्या मंडळींनी पतीकडून मानसिक त्रास दिला गेल्याचा आरोप केला आहे. याप्रकरणी कोराडी पोलिसांत आकस्मिक मृत्यूची नोंद करण्यात आली आहे. मृतकाच्या भावाच्या तक्रारीवरुन पोलीस अधिक तपास करत आहेत.
