धुळ्यातून एक धक्कादायक बातमी समोर आली आहे. शहरातील स्नेहनगर परिसरातुन ही दुर्दैवी घटना समोर आली आहे. महानगरपालिकेच्या माजी स्थायी समिती सभापती सोनल शिंदे यांचा मुलगा विराज शिंदे याने आपल्या राहत्या घरी गळफास घेऊन आत्महत्या केली.
मिळालेल्या माहितीनुसार, आत्महत्येच्या दिवशी विराज घरी एकटाच होता. कुटुंबीय बाहेर गेले असताना त्याने गळफास घेऊन आपले आयुष्य संपवले.
काही वेळानंतर कुटुंबीय घरी परतल्यानंतर हा प्रकार त्यांच्या लक्षात आला. त्यांनी तात्काळ विराजला जवळच्या खासगी रुग्णालयात दाखल केले. मात्र, डॉक्टरांनी तपासणीअंती त्याचा मृत्यू आधीच झाल्याचे घोषित केले. ही घटना गुरुवारी (११ सप्टेंबर) रात्री उशिरा उघडकीस आली असून, शहरात एकच खळबळ उडाली आहे.
विशेष म्हणजे मंगळवारीच म्हणजेच ९ सप्टेंबरला विराजचा वाढदिवस कुटुंबीय आणि मित्रमंडळींसोबत आनंदात साजरा करण्यात आला होता. त्यानंतर अवघ्या दोन दिवसांतच त्याच्या अशा प्रकारे अचानक मृत्यू झाल्याने परिसरात हळहळ व्यक्त केली जात आहे.
