बीडच्या गेवराईतील लुखमासला गावचे माजी उपसरपंच गोविंद बर्गे यांनी काही दिवसांपूर्वी पिस्तुलातून स्वतःवर गोळी झाडून आत्महत्या केली. या घटनेमुळे एकच खळबळ उडाली असून आता ही आत्महत्या आहे की घातपात यावरून बरीच उलटसुलट चर्चा आहे. बर्गे यांच्या नातेवाईकांच्या आरोपानंतर पोलिसांनी पूजाविरोधात गुन्हा दाखल करत तिला ताब्यात घेतलं. कोर्टाने तिला तीन दिवसांची पोलीस कोठडी ठोठावली असून पोलीस तिची कसून चौकशी करत आहेत.
बर्गे यांच्या मृत्यूप्रकरणात नर्तिका पूजा गायकवाड हिचं नाव सातत्याने समोर येत असून तिच्या प्रेमात वेड्या झालेल्या बर्गे यांनीच आयुष्य संपवलं असं काहीचं म्हणणं आहे. या आत्महत्येनंतर पूजा गायकवाड बरीच चर्चेत असून सोशल मीडियावरही तिच्या नावाची बरीच चर्चा सुरू आहे.
नर्तिका असलेल्या पूजाचे इन्स्टाग्रामवर अकाऊंट असून तिथे तिने वेगवेगळी रील्स टाकली आहेत. विशेष बाब म्हणजे २ दिवसांपूर्वी पूजाचे अवघे ५००-७०० फॉलोअर्स होते. मात्र गोविंद बर्गे मृत्यूप्रकरण समोर आल्यानंतर तिच्या फॉलोअर्समध्ये मोठी वाढ झाली आहे. आज तिचे एकूण २६ हजार २०० फॉलोअर्स आहेत. तिने या अकाऊंटवर आत्तापर्यंत ३० पोस्ट केल्या असून त्यामध्ये ५०० रुपयांच्या नोटेसह केलेल्या रीलची तर तूफान चर्चा आहे.
