छत्रपती संभाजीनगरमध्ये एक धक्कादायक घटना उघडकीस आली आहे. अभ्यास कर आई फक्त एवढंच म्हणाली मात्र याच गोष्टीचा राग मनात धरून एका १८ वर्षीय नर्सिंगच्या विद्यार्थिनीनं धक्कादायक पाऊल उचललं आहे. अगदी लहान कारणामुळे विद्यार्थिनीनं गळफास घेऊन आयुष्य संपवलंय. ही घटना रविवारी उघडकीस आली.
.
विशाखा अनिल वक्ते असे मृत तरूणीचे नाव आहे. ती छत्रपती संभाजीनगरमधील वडगाव कोल्हाटी भागात रहिवासी आहे. विशाखा नर्सिंगच्या प्रथम वर्षात शिक्षण घेत होती. तर, तिचे वडील एका कंपनीत काम करतात. घटनेच्या दिवशी सायंकाळच्या सुमारास विशाखा टिव्ही पाहत होती.
त्यावेळेस विशाखाची आई किचनमधून बाहेर आली. नंतर विशाखाला अभ्यास करण्यास सांगितले. नंतर विशाखाची आई किचनमध्ये गेली. त्यावेळी विशाखाचा लहान भाऊ दुसऱ्या खोलीत अभ्यास करत होता. विशाखाला आईच्या बोलण्याचा राग आला. राग मनात धरून विशाखा तिसऱ्या मजल्यावर गेली.
घरातील तिसऱ्या मजल्यावरील पायऱ्यांवर तिनं गळफास लावून आत्महत्या केली. विशाखाला गळफास घेतलेल्या अवस्थेत पाहून आईला धक्का बसला. तिनं तातडीने शेजाऱ्यांना बोलावून घेतलं. तसेच विशाखाला बेशुद्धावस्थेत घाटी रुग्णालयात दाखल केले. मात्र, डॉक्टरांनी तपासून विशाखाला मृत घोषित केले.
