बीडच्या परळीतील व्यापारी महादेव मुंडे हत्या प्रकरणात मोठी अपडेट समोर आली आहे. महादेव मुंडे यांचा शवविच्छेदन अहवाल समोर आला आहे. ९ पानांच्या या पीएम रिपोर्टमधून त्यांची किती क्रूरपणे हत्या करण्यात आली होती ही माहिती समोर आली आहे. बीडचे मस्साजोगचे सरपंच संतोष मुंडे यांच्यापेक्षा भयंकर पद्धतीने महादेव मुंडे यांना संपवण्यात आले होते. गुन्हेगारांच्या कृत्याने अगदी मृत्यूही थरथरला आहे.
महादेव मुंडे यांची 20 महिन्यांपूर्वी परळीत निर्घृण हत्या झाली होती. मात्र याप्रकरणात एकाही आरोपीला अद्याप अटक करण्यात आली नाही. या हत्याकांडातील आरोपी कोण याचाच पोलीस 18 महिने उलटूनही शोध घेत आहेत.परळीतील महादेव मुंडे खून प्रकरणाचा शवविच्छेदन रिपोर्ट हाती लागला असून यात अंगावर काटा आणणारी माहिती समोर आली आहे.
मुंडे यांच्या अंगावर १६ वार आहेत. महादेव यांचा अगोदर गळा कापला. त्यातील एक वार हा २० सेमीपर्यंत लांब, ८ सेमी रूंद आणि ३ सेमी खोल असा होता. त्यानंतर त्यांच्या मानेवर उजव्या बाजूने चार वार करण्यात आले.प्रतिकार करतानाही त्यांच्या हाताला जखमा झाल्याचे अहवालात नमुद आहे. त्यांची श्वसननलिका कापली होती. मुख्य रक्तवाहिन्या देखील खोलवर झालेल्या वारामध्ये कापल्या होत्या. मानेवर, हातावर, तोंडावर आणि इतर ठिकाणी एकूण 16 वार करण्यात आले होते. चेहरा, छाती, दोन्ही हात आणि शरीराचा इतर भाग रक्ताने माखलेला होता.
महादेव मुंडे यांच्या शरीरावरील वाराने आरोपींची क्रूरता स्पष्ट होते. या मारहाणीमुळे महादेव मुंडे यांच्या शरीरातून अतिरिक्त रक्तस्त्राव झाला. श्वसननलिका कापली, रक्तवाहिन्या तुटल्या. डाव्या व उजव्या हाताला अंगठ्याजवळ, तळहातावर, मधल्या बोटाजवळ वार झाल्याचे अहवालात समोर आले आहे. खाली पडल्याने डावा गुडघा खरचटलेला आहे. महादेव मुंडेंनी शेवटपर्यंत जीव वाचवण्याचा प्रयत्न केल्याचे समोर आले आहे.
