विवाहबाह्य संबंधामुळे अनेक धक्कादायक घटना समोर येत आहे. अमरावतीमधून देखील अशीच एक खळबळजनक घटना समोर आली आहे. प्रेमसंबंधातून पत्नीनेच प्रियकराच्या मदतीने पतीची हत्या केल्याची धक्कादायक घटना समोर आली आहे.
नेमकं काय घडलं ?
व्यवसायाने चालक असलेल्या अरविंद नजीर सुरत्नेचा (37, रा. गरजदरी, ह.मु. पथ्रोट) प्रेमविवाह झाला होता. तो पत्नी व दोन मुलांसमवेत झेंडा चौक परिसरात भाड्याने राहत होता. अरविंद यांना आपल्या पत्नीच्या बाह्य प्रेमसंबंधांची कुणकुण लागली होती. दोन दिवसांपूर्वी अरविंद यांच्या घरचे गॅस सिलिंडर संपले होते.
त्यावेळी पत्नीच्या प्रियकराने म्हणजेत आरोपी अमित लवकुश मिश्राने (33, रा. पथ्रोट) ते भरून आणले होते. ती गोष्टी अरविंद यांना समजल्यानंतर त्यांनी पत्नीला याबाबत जाब विचारला. आरोपीने आणून दिलेल्या सिलिंडरमुळे त्यांच्यातील वाद वाढला. २ सप्टेंबरला रात्री अरविंद व त्यांच्या पत्नीत कडाक्याचे भांडण झाले. ती बाब तिने आरोपीला सांगितली. संबंधित महिलेने पतीला झोपेच्या गोळ्या दिल्या त्यानंतर आरोपी प्रियकर अरविंदच्या घरी पोहोचला. अरविंदच्या चेहऱ्यावर राफ्टरने वार करून त्याला जिवानिशी ठार करण्यात आलं. दोघांनी मिळून अरविंदचा खून केला. अरविंद यांची पत्नी आरोपीकडे स्वयंपाकाचे काम करायची. आरोपी अविवाहित आहे.
मृताचा मोठा भाऊ अशोक यांनी याप्रकरणी पोलिसात तक्रार दाखल केली होती. पोलिसांनी मारेकरी अमित याच्यासह 38 वर्षीय महिलेला अटक करून त्यांना बुधवारी न्यायालयात हजर केले. दोघांनाही एका दिवसाची पोलिस कोठडी सुनावण्यात आली.
